Pavarësisht një fillimi të jashtëzakonshëm duke gjetur golin e epërsisë pas vetëm 34 sekondave, gjërat nuk shkuan mirë tutje për Kosovën kundër Anglisë.

Kombëtarja jonë arriti të kalojë në avantazh qysh në minutën e parë duke realizuar me anë të mesfushorit Valon Berisha pas një gabimi të papritur nga mbrojtja e nikoqirëve, shkruan portali arbresh.info.

Vedat Muriqi rrëmbeu topin duke asistuar te mesfushori i Lazios që zhbllokoi në formë tronditëse rezultatin.

Sidoqoftë, Raheem Sterling barazoi gjithçka në minutën e 8′ duke shënuar me kokë për 1 me 1.

Sulmuesi i Manchester Cityt luajti një rol të madh edhe në golin e përmbysjes nga “Tre Luanët” duke nisur gjithçka si dhe duke asistuar te Harry Kane në minutën e 19′ për 2 me 1.

Mërgim Vojvoda shënoi autogol për 3 me 1, ndërsa goli i katërt u shënua nga Jadon Sancho pas një kundërsulmi.

Talenti Sancho realizoi për 5 me 1 edhe gjatë minutave shtesë.

Vlen të përmendet që Bernard Challandes është përjashtuar nga ndeshja si pasojë e reagimeve të ashpra ndaj gjyqtarit.

Portali arbresh.info do t’iu mbajë të informuar në kohë reale për çdo zhvillim./arbresh.info/